Sketch zum Pädagogischen Tag 2018 am Realgymnasium „Albert Einstein“ Meran
Aufgeführt am 12. November 2018 von Christian Zelger

Person geht in einem Buch lesend über die Bühne, bleibt in der Mitte stehen, schaut verwundert ins Publikum.

Oh, do sein Leit. Jå, tuat mr load, wer do iaz eppes erwårtet håt. Wia ess seggs, mir sein ålle meine Spielpartner åbhånden kemmen. Man redt ållm von Kontinuität an der Schual. Und wenn man sie dånn amåll brauchet. (kurze Pause) I hån woll in die letschten Wochn ummergfrågg, ob jemand mitspieln tatt. Guat, seimer ehrlich, die Almut war eh nitt zu ersetzen gwesen.

Also, dånn ... no guatn pädagogischen Tog ins ålle. (geht weiter, dreht dann doch um) Auf der ånderen Seit, iaz wo i schun amåll do bin.

Oans mecht i gern soogn: An der Schual isch man schun hin- und hergerissen. (etwas langsamer) Hin- und hergrissen ...

... zwischen Bewährtem und Nuin,

... zwischen Bildung und Ausbildung,

... zwischen Inhålt und Inszenierung,

... zwischen nuien und åltn Direktor. (leiser) I moan, es sein jå ållm beade do. (Pause) Månche spitze Zunge sogg sogor: Beade mehr als vorn 1. September.

Mitn nuien Schualjohr håt sich hålt einiges geändert.

Obwohl mir bei der Veråbschiedungs- und Übergabefeier zuviel gschaugg wordn isch, ob dr Direktor Oberstaller bereit für die Pension isch. Niamand håt gfrogg, ob der Direktor Weis bereit für RG und TFO isch. Do sein oanfåch a poor wichtige Frogn gor nitt gstellt wordn. Ob er so Grundfertigkeiten mitbringg, de mir bis iaz gwöhnt wårn. Zum Beispiel:

(mit Fingern vorzählend) a) Konner mit an Fotoapparat umgian?

b) Schåfft ers a Sitzung zu leiten (betont) und gleichzeitig E-Mails zu schreiben?

c) Ischer imstånd, seine Überzeugungen in oanen oanzigen Såtz zu destillieren, den a no der desinteressierteste Schialer jederzeit wiedergebm kånn?

d) Und natürlich die Königsfrage: (langsam und bedächtig) Beherrscht er die hohe Kunst der anwesenden Abwesenheit? (Pause) A wenn der Direktor Oberstaller amåll nitt do gwesn isch, håt er ållm ålls mitgekriag und gwisst.

(relativierend) Auf der ånderen Seit: Mir hoobm mittn nuien Direktor schun groaßes Glück ghåpp. Groaßes Glück. (ernst) Also, wås do ålls hatt passieren kennen.

Mir hoobm in Luis aus Meran gekriag. Stellts enk vor, es war dr Luis aus Südtirol gwordn, dr Gåggelbauer.

(zufrieden) Des passt schun. I bin zufrieden. Ålls wås er sågg isch geprägt von (Kunstpause) Weis-heit. Und er isch a Mathematiker. (kurze Pause, schwärmerisch) Der so wunderbåre Gleichungen hinkriag wia 1 PÄDAGOGISCHER TAG = ½ PÄDAGOGISCHER TAG. Fantastisch. d gleich 0,5d.

Ober nitt lei bei ins gibbs Nuis. Im Schualåmt jå a. (schwärmerisch) Also bei der nuien Schualåmtsleiterin ... wenn i sie sieg ... zemm kriag i ållm so ... (begeistert) Visionen! (betonend) Fårbige Visionen. (erklärend) Vielleicht hängg des mit ihrn Titel zåmm: Landesschuldirektorin. (kurze Pause) Åbgekürzt: LSD.

(etwas genervt) Jå, jå, Visionen. Oder die Steigerungsstufe davon: (fast schon leidend) Visionen im Schulwesen. (erklärend) Seimer ehrlich: Der Lehrer – Mandl und Weibele, gell! – muaß sich in der Materie auskennen, er muaß für seine Inhålte brennen, an Droht zu dieSchialer finden und wenn dånn no Vielfålt nitt oanfåch dr Plural von Einfålt isch, dånn sein Visionen fürs Togesgeschäft eher zweitrangig. Oftramåll a hinderlich. Der Politiker Helmut Schmidt (zum Himmel zeigend) selig hått sogor gsogg: (abgeklärt) „Wer Visionen hått, soll zun Augenårzt gian.“ Guat, sell isch iaz vielleicht a a bissl übertriebn.

Ober iaz zum Pädagogischen Tog. Oan Thema isch heint jå die Evaluation. Des isch so a Lieblingsthema von a poor, hån is Gfühl.

Dabei isch es jå nitt lei ban Unterrichten so. (kurze Pause) Kimm i in der Friah zur Schual ... triff i auf an Lehrer ... frogg mi der „Wia geaht‘s?“ ... werd schun evaluiert. Ober mir wissen jå. Die Åntwort auf die Frog „Wia geaht’s?“ isch nitt, wias mr wirklich geaht, sondern „Geaht schun.“ Und ab und zua kimp mr fiir, dass des bei der Evaluation in der Schual a so isch. Es soll sich jå nitt zu viel ändern. Weil s Evaluationsergebnis isch (betonend) ållm und überåll (kurze Pause) „Geaht schun.“ Suscht tatt ja die Schual gor nitt funktionieren, wenns åndersch war. Oder?

An ånders groaßes Thema, nitt lei beim Pädagogischen Tog und nitt lei weil mir TFO und RG sein, sein (mit Fingern zeigen) Zohlen. (kurze Pause) Einschreibezohlen, WLAN-Bandbreiten, Außendienstkontingente, Überstundenbudgets, Koordinatorenstunden, Ausleihzohlen, ... – (außer Atem) also wenn do als Direktor nitt Mathematiker bisch –

... und natürlich nitt zu vergessen (langsamer werdend) der Heilige Gral. (betonend) Der Heilige Gral.

Es werds schaugn, i hånnen mitgebrocht. Man kånnen sogor fålten wia die nuien Smartphones. (Spannung aufbauend, dann enthüllend) Die 100er bei der Matura.

Friaher håtts zwoa, vielleicht drei 60er an der gånzen Schual gebm und de sein heint Uniprofessoren, fliagn Rettungshubschrauber oder sitzen im Aufsichtsrot von an DAX-Unternehmen.

Und heint? (Pause) Es isch schun a bissl inflationär gwordn. Im Summer håt jå a Direktorin an Leserbriaf gschriebm und sich aufgregg, dass in der Zeitung gståndn isch, dass es an ihrer Schual so viele Nochprüfungen gebm hått. Und ihre Åntwort? Man muaß schun a segn wie viele 100er ihre Schual hervorgebrocht håt.

Des erinnert mi a bissl (nostalgisch) ans erschte Pixi-Biachl, des i für zehn Fleißzettel in der Volksschual gekriag hån. Zemm wår vorne oben a Fisch, der in der Luft fliag und drunter isch gståndn: „Hier stimmt was nicht.“

(fast verärgert) Als ob de 100er s Moß åller Dinge waren. Sozusogn der (langsamer) Scholae-Mensura-Satz. (sich rechtfertigend) A bissl Philosophie hån i lei innibringen miaßn. Die Almut tat eh schimpfen mit mir.

No an letschten Gedånken. Heint geahts in die Workshops jå a um Transparenz. Des håt jå a mit Durchblick, mit Klårheit zu tian. Vielleicht wars schian, wenn es bei Nuierungen – zum Beispiel die nuie Matura – amåll rechtzeitig klåre, ånwendbåre Regelungen gabet. Isch sell wirklich zu viel verlångg? (genervt) Des Ummergegåggle ohne Zeitverständnis. Des war jå wia wenn man ... (nach Ideen suchend)

... zerscht fürn Brexit stimmp und sich nochher Gedånken måcht, wås des bedeitet;

... oder Weihnåchtskekseln båckt und dånn draufkimp, morgen isch Aschermittwoch.

(fast schon verärgert) Ober wåhrscheinlich werd des hin- und hergschobn und von oan Ausschuss in åndern gebm. (feststellend) Und niamånd traut sich.

Do fållt mr eppes ein, wås sie grod glesen hån. (blättert im Buch) Wo isch es denn? Ach jå, do. (liest vor) „Wenn möglich, verweisen Sie sämtliche Themen zur »genaueren Untersuchung und Planung« an Ausschüsse. Wirken Sie darauf hin, dass diese Ausschüsse möglichst viele Mitglieder haben – niemals weniger als fünf.“

Schian, gell? (aufklärend) Na, des ståmmt nitt von an Rotgeber für Schulführungskräfte.

Des isch aus an amerikanischen Sabotagehåndbuach ausm Zwoatn Weltkriag. De werdn gwisst hoobm brumm. (kurze Pause) Wia a ållm: I frei mi iaz jedenfålls auf die Geståltung von Schualhof.

Person verschwindet weiter im Buch lesend.