Sketch zum Pädagogischen Tag 2015 am Realgymnasium „Albert Einstein“ Meran
Aufgeführt am 7. Oktober 2015 von Christian Zelger und Simon Schwarz

Die beiden Sekretärinnen Agnes und Susanne kommen am Morgen ins Foyer und ziehen ihre Kennkarte durch die digitale Stechuhr. Dabei treffen sie aufeinander. Ein neuer Schultag beginnt.

Agnes: Guatn Morgn, Susanne!

Susanne: Guatn Morgn, Agnes!

Agnes: Schaugmr amål wia viel mir heint zu tian kriagn?

Susanne: Wieso?

Agnes: Woasch, die Lehrer håmm heint in Pädagogischen Tog.

Susanne: Wås tiansin zemm?

Agnes: I moan, de lernen wia man unterrichtet.

Susanne: Kennen sie sell nitt schun?

Agnes: (aufklärend) Na, na, nitt ålle. Onscheinend sein die Philosophie/Geschichte-Lehrer die schlimmschtn.

Susanne: Schun?

Agnes: Jå, wås man so heart. Dabei: Der Schwarz måcht mir eigentlich an guatn Eindruck.

Susanne: Jå, und der Zelger isch woll a nitt übel, oder?

Agnes: Du, Susanne, i glab, des taischt. Des taischt! Des sein hahle Burschn.

Susanne: Und a so a Tog hilft dånn?

Agnes: Sogn tian sie’s.

Susanne: Wer sågg sell?

Agnes: I glab s Schualåmt.

Susanne: Um wås geahts denn haint?

Agnes: Ma, dr Direkter håt mr schun an E-Mail gschriebn. I hånn woll versuacht, es zu verschtian, obr wohrscheinlich hatt i mehr verschtondn, wenn er mrs auf Englisch gschriebn hatt. Do schtian so Såchn drin wia „Mehrdimensionalität des Kompetenzkonstrukts“.

Susanne: Mehrdimensionalität des Kompetenz-wås? (zuckt mit den Achseln) I hån über 20 Johr pa an Metzger gårbetet. Also, Wurscht, Aufschnitt, Speck ... sell hoaßt eppes, ober des hoaßt, glab i, gor nix.

Agnes: Na, i glab a nitt.

Susanne: Wås tianen iaz die Lehrer pa den Pädagogischen Tog?

Agnes: Ma, zerscht sitzn sie in Mehrzwecksool und horchn in zwoa Lehrer zua, de versuachn luschtig zu sein.

Susanne: (lacht) Du, Agnes, wår des iaz nitt selbstreferentiell?

Agnes: Jå, eigentlich schun, ober, woasch, mir im Sekretariat verwendn sette gschwollene Wörter normalerweise nitt.

Susanne: Jå, obr a die meischtn Lehrer soogn jo a nitt so Såchn wia „lernfeldübergreifende Curriculumsrezeption“.

Agnes: Na, i glab, de unterrichtn oanfåch.

Susanne: (ganz überrascht) Wia? Geaht sell überhaupt no?

Agnes: Jå, wia du sigsch!

Susanne: Jå, eh! Mir derweern ins pa die Einschreibungen jå kaum fa die Schialer. Also, ålles fålsch måchn kennen de nitt.

Agnes: Na, eh nitt! (kurze Pause, dann belehrend) Außer die Philosophie/Geschichte-Lehrer!

Susanne: Und trotzdem sitzn de heint in gånzn Toog do?

Agnes: Na, na, lei in hålbn. Woasch, inser Direkter isch hålt humaner als die meischtn åndern.

Susanne: Heiliger Franz Josef, sell schtimmt! (kurze Pause) Obr in gånzn Vormittag, sell isch a no a långe Zeit. Wås seinen für Themen?

Agnes: Af dr Togesordnung schteat eppes fa Inklusion, glab i.

Susanne: (neugierig) Inklusion? Isch sell eppes guats? Weil: Mein Månn håt mir amåll an Diamantring gschenkt. Und dånn bin i draufkemmen, dass der Schtoan an Inklusion hått. Du, i sog drs, zemm wors Fuier in Dåch!

Agnes: Ach, in der Schual laafn die Såchn schun öfter åndersch als im richtigen Leben.

Susanne: Wenn’s Schualåmt davon überzeugt isch, dånn werd des schun seine Richtigkeit hobn.

Agnes: Ah jå, zemm sein jå die beschtn Leit.

Susanne: Und isch sell dånn olls?

Agnes: Na, na, na, s groaße Thema heint isch Cloud.

Susanne: Cloud?

Agnes: Jo, i hear vom Direkter lei mehr Cloud, Cloud, Cloud. Zerscht hån i gmoant, er redet von der Claudia, obr, na, sell wor’s nitt. Dånn hånn i gmoant, er håt a nuie Freindin, de Cloud hoaßt, weil s in gånzn Tog lei hoaßt, Cloud do, Cloud zemm, i muaß eppes für die Cloud tippn. Obr do bin i a wieder fålsch gleegn.

Susanne: (neugierig) Jo, und wer isch des dånn? Soog schun!

Agnes: (aufklärend) Na, des isch niamand, des isch eppes pan Computer. (belehrend) Do ändert sich iaz goor ålls.

Susanne: Goor ålls? Wirklich? Isch sell nit a bissl viel?

Agnes: Onscheinend nitt.

Susanne: Jå, wås ändertn sich zum Beispiel?

Agnes: Stått dass einige Fåchgruppn ihre Protokolle nitt aufn Server speichern, speichern sie sie iaz nitt in der Cloud.

Susanne: Ah, so?

Agnes: (nicht ganz überzeugt) Jo, es hoaßt, des isch die Zukunft.

Susanne: Sell håt man pa dr Atomkråft a gsogg!

Agnes: Des kånn man obr onscheinend a fürn Unterricht brauchn.

Susanne: (ungläubig) Für ålle Fächer?

Agnes: (vorsichtig) Jå!

Susanne: Also, a Wunder. (verstehend) Ah, deswegn isch des ålls in die Wolkn obn.

Agnes: Ah, und vielleicht will man deswegn ålle Fåcher in oan Topf werfn.

Susanne: Håtts huier in Bozen pa dr Großtogung nitt ghoaßn „Individualität garantiert Zukunft“?

Agnes: Jå, und hått die Frau Professor Schenk nitt in der Zeitung gsogg: „Es gibb koan pädagogisches Patentrezept“?

Susanne: (mit erhobenem Zeigefinger) Genau. Und niamand unterrichtet so begeischtert, so lång und so erfolgreich wia sie!

Agnes: Sell kånsch laut sogn!

Susanne: Also, Agnes, mi überzeugt de gånze Gschicht nitt.

Agnes: (ironisch) Derfir kennen mr iaz ålle Probleme lösn – de mr vorher gor nitt ghopp hobm.

Susanne: Agnes, kimm, iaz låssmrs.

Agnes: Jo, bevor no a Rundschreibm von Schualåmt kimp.

Die beiden Sekretärinnen gehen zu ihrem Arbeitsplatz.